جابك الله من فـراق ضيـق صـدور المبانـي
قبل لا الوحشه تزعزع بيتـك الصلـب وتبيـده
بيتك اللي من رحلـت وكـل جدرانـه تعانـي
ماتحمـل ينتظـر شهريـن وعيونـك بعـيـده
الله العالـم لـو انـك جيـت متأخـر ثوانـي
ماتشوف إلا بقايـا مـن حصـاه ومـن حديـد
من عرفتك وانت ضايع من مواني لي موانـي
وتارك قلبـي يولـع مـن وقيـده لـي وقيـده
ضاع عمري بـس أحـد بهالليالـي واتحدانـي
وانت لا تشبع غياب ولا تخـاف مـن النقيـده
ودي أتحمد لك الله بالسلامـة ... مـا مدانـي
كل ماتوصل برحلـه ترجـع برحلـه جديـده
دام تدري كـل وجـه غيـر وجـه الله فانـي
يا خي اكسب لك ثواب وخاف ربك في عبيـده
كان فيني عيب قلي ... فيني العيـب الفلانـي
كان هرجي مزعلك في شـي قلـي : لاتعيـده
لعنبوك ان مت بيدك وش يفكك من خوانـي ؟!
لا حزنوا ربعي علي ومت... شاللي تستفيـده ؟
ليه تصغر في عيوني وانت برقـاب الغوانـي
عيب تستسهل طعوني وانـت خابرنـي وليـده
انت منت اللي عشقته !! انت اكيد انسان ثانـي
كيف صرت بهالبـرود وهالأحاسيـس البليـده
وين حبك للزعل ... وين العنـاد الأولانـي ؟
وين حنية زمـان وفرحـة العمـر الرغيـده ؟
وين ذاك اللي ليـا أقبـل مايبـات الا بأمانـي
وين رايح اللـي ليـا قفـا مايـروح الا فقيـده
واحـد جابـه الله بـس يـامـر ويعصـانـي
الوحيد اللي أخافه غصب وامشي معه "سيـده"
مابغيـت اطيـح بيـده ليـن ماربـي بـلانـي
والا انا لو هي بكيفي ... مابغيت اطيـح بيـده
ذاك بس اللي ليـا مـن شفتـه يلخبـط كيانـي
ذاك من نظرة ينشـف دم قلبـي مـن وريـده
قبل اشوفه أجمع إله أحلى القصايـد والمعانـي
وان بقيته ماعرفت اقـول لـي جملـة مفيـده
الف مـرة قبلـه اعـد القصيـده مـن لسانـي
ولعنبوه ان جيت عنده قمت اخربط بالقصيـده !
امدحه وانـا ادري انـه لـو تباطانـي نسانـي
انطحه وانا اعرفه مجنـون و أفكـاره عنيـده
من يسوي بس سواتـك يالرهيـف الاسمرانـي
منهو من الناس غيرك غلطته ترفع رصيـده ؟!
من يقص جناح طيرك وانت اعز انسان جانـي
كيف اخاف رماح غيرك وانت طعناتك سديـده
إن تبعتك أتبعك مـن طيبـي وواسـع بطانـي
والا انا لا جيت اكيد انسان تدري كيـف اكيـده
اقدر انزع ثوب طيبي والبـس ثيـاب الانانـي
واقدر اطلع من عذابي والعب بدورك واجيـده
وان بغيت اكسب رهاني بأي وقت اكسب رهاني
واخدعك بإحساس كاذب واتحدى مـن يصيـده
ابك انا لاشفت خلي حط غيـري فـي مكانـي
والله اني لاتركه واصد واعشـق سيـد سيـده
خلني داخل حدودك واجبـر بخاطـر زمانـي
إكذب فباقي وعودك واصـدق بلحظـة سعيـده
إنتشلنـي مـن بـرودك لـو تولـع بالمحانـي
عطني إحساس بوجودك واخذ كل اللي تريـده
تكفى واليا قلت تكفى بيـع خلـق الله عشانـي
لا تضيع من يدينـي فرصـة العمـر الوحيـده
جيت مابيك تحقرني جيت ابيـك تعـز شانـي
جيت ابي فزعة ضلوعك من مشاعرك البليـده
يعلم الله شفـت منـك ومـن غيابـك ماكفانـي
كان ماتقـدر تخفـف هـم قلبـي ... لاتزيـده
شف غيابك وش يسـوي بالصـدور وبالمبانـي
وأنت تدري كيف كانت صدمة غيابـك شديـده
والله إنك لو وصلـت البيـت متأخـر ثوانـي
مالقيت إلا بقايـا مـن حصـاه ومـن حديـده
الإثنين فبراير 06, 2012 2:13 pm